Una muyer sudanesa amuesa cómo facer kisra, un pan o fariñes tradicional de Sudán y Sudán del Sur. Foto de Mohamed Elfatih Hamadien, asoleyada cola llicencia llibre CC BY-SA 4.0.
Por munchos motivos, bona parte d’ellos rellacionaos con sesgos del sistema, la cobertura de los asuntos africanos en munchos sitios de Wikimedia, incluyendo les distintes Wikipedies, va retrasada respeuto d’otros continentes. Hai un proyectu empobináu a cambiar eso animando a que la xente del continente africanu done les sos imaxes, videos, y soníu a Wikipedia.
Florence Devouard (Anthere) ya Isla Haddow-Flood (Islahaddow) son los organizadores de Wiki Loves Africa, un programa qu’usa aspeutos competitivos y temáticos p’afalar que los individuos donen a Wikimedia Commons. «Necesitamos una manera divertida d’amosar lo rica, diferente, y prestosa que ye África más allá de los deprimentes titulares», dixeron. Queríen dicir «rica» lliteralmente (el tema del últimu añu foi la cocina). Pudieron collechar más de 6000 imaxes de 873 participantes de 49 paises, incluyendo la increíble foto d’arriba d’una muyer sudanesa faciendo’l tradicional y popular pan kisra.
El tema de Wiki Loves Africa’s cambia cada añu pa cubrir un asuntu universal, visualmente ricu, y culturalmente específicu como los mercaos, ritos de pasu, festivales, arte públicu, y vezos sociales. La edición de 2015 céntrase nes modes culturales al traviés del continente africanu. Florence ya Isla faen notar que los «participantes pueden unviar multimedia qu’ilustre la moda tal como la definen les influencies culturales llocales que pueden tar determinaes pol vistíu, estilos, maneres d’endolcar y colgar, etc. Esti tema tamién incluye los adornos como la xoyería con influencies culturales, maquillaxe, peinaos, marques corporales, teles y texíos.»
El concursu dura hasta’l final de payares, ya’l primer premiu ye un Galaxy Tab S 8.4. Acéutense entraes de tol mundu mentanto qu’amuesen dalgún aspeutu de les diverses modes culturales africanes, y puedes participar:
- Entrando direutamente a Wikimedia Commons a xubir les tos fotografíes.
- Algamando formación y conseyos de los equipos de wikimedistes asitiaos en Costa de Marfil, Camerún, Exiptu, Arxelia, Túnez, Tanzania, Nixeria y Uganda.
- Lleendo los conseyos pa tomar meyores fotografíes (en francés).
Wiki Loves Africa ta financiáu con una subvención de la Fundación Wikimedia de 22.760 US$ y con una campaña de financiamientu masivu en Indiegogo.
Saber más
- El sitiu oficial internacional
- La páxina de Facebook
- Síguenos en twitter
- Ganadores de Wiki Loves Africa 2014
Ed Erhart, Editor Asociáu, Wikimedia Foundation
Florence Devouard y Isla Haddow-Flood, Wikipedistes
In Brief:
Tercer llugar: un íbice alpín (Capra ibex), o Steinbock, nun parque nacional d’Austria del cordal Hohe Tauern. Foto de Bernd Thaller, asoleyada cola llicencia llibre CC BY-SA 3.0
Earth: Los ganadores del concursu Wiki Loves Earth de 2015 vienen d’anunciase. Arriba pué vese’l ganador del tercer premiu.
Monuments: El boletín This Month in GLAM informa de que Wiki Loves Monuments n’Italia foi un éxitu ablucante: 947 participantes que tomaron 12.740 fotografíes de 5.149 monumentos (un términu xenéricu que s’usa pa los llugares del patrimoniu cultural qu’esisten pel mundu). Esos resultaos algamáronse en parte pola cooperación con centenares d’instituciones públiques a niveles estatal y llocal. Les fotos ganadores d’Alemaña y Paquistán tamién s’espublizaron yá.
Informe trimestral: L’informe de la Fundación Wikimedia (WMF) pal primer trimestre del añu fiscal 2015-16 yá ta asoleyáu.
Revisiones trimestrales: Les revisiones trimestrales de los departamentos de la WMF del últimu trimestre yá tán espublizaes. Estes revisiones [WMF Metrics and activities meetings/Quarterly reviews busquen] «garantizar la rindición de cuentes y crear les oportunidaes p’axustar la dirección y l’allugamientu de recursos en consultando colos grupos que trabayen n’iniciatives específiques de la Fundación Wikimedia».
Wiki Ed: Asoleyóse l’informe de setiembre de la Wiki Education Foundation. Esta fundación tien 74 formadores esti cursu, más cantidá que nunca, con 133 cursos y más de 2000 estudiantes.
Ed Erhart, Editor Asociáu, Wikimedia Foundation
¡Bienveníos al nuevu compendiu de la comunidá! Esta ye una nueva carauterística selmanal pal blog, y prestaríanos convidate a participar. Esti compendiu de noticies de la comunidá Wikimedista xuntará elementos d’alredor del mundu pa ufrite un espaciu pa la to actualidá y una ronda diversa d’actividaes. L’oxetivu ye imitar y suplementar les fontes de noticies comunitaries yá esistentes. ¡Les collaboraciones son bienveníes! Si hai un finxu, un proyeutu nuevu prestosu, o una ocurrencia poco convencional na to comunidá de Wikimedia, por favos, mándame un corréu o dexa un mensaxe na mio páxina d’alderique.